postkhmer
សេត គឹមសឿន
បូស្តុន/កាលីហ្វ័រនីញ៉ាៈ ទោះបីមិនទាន់ចេញជា CD ឬDVD តែបទមនោសញ្ចេតនាដ៏ជ្រាលជ្រៅជាភាសាខ្មែរដែលមានចំណងជើងថា «ចម្លើយចុងក្រោយ» (The Final Answer) របស់តារាចម្រៀងកូនខ្មែរនៅអាមេរិកលោក ឆេយ ចេន(Jay Chan) កំពុងផ្ទុះខ្លាំងនៅសហរដ្ឋអាមេរិក ពិសេសតាមប្រព័ន្ធអ៊ីនធឺណិត ខណៈដែលបទចម្រៀងទី១របស់តារារូបនេះស្ទើរតែផលិតឡើងមានគុណភាព ល្អជាងបទចម្រៀងនៅក្នុងស្រុកខ្មែរទៅទៀត។
Jay Chan មានឈ្មោះជាភាសាខ្មែរថា ប៉ែន ចាន់ធឿន លោកកើតនៅថ្ងៃទី១០ ខែសីហា ឆ្នាំ១៩៨០ នៅខេត្តបាត់ដំបង។ ដោយសល់ជីវិតរស់ពីរបបខ្មែរក្រហម Jay Chan ដែលរស់នៅជំរំខាវដាង តាមបណ្តោយព្រំដែនកម្ពុជា-ថៃ បានវេចសម្ពាយជាមួយម្តាយ និងបងស្រីចាកចេញពីប្រទេសកម្ពុជាទៅកាន់សហរដ្ឋអាមេរិកនៅក្នុង ឆ្នាំ១៩៨៥។ ម្តាយរបស់ Jay Chan មានឈ្មោះថា ប៉ែន ចន្ថា ជាអតីតតារាចម្រៀងមានឈ្មោះបោះសំឡេងគួរសមម្នាក់កាលពីសម័យនោះ។ សព្វថ្ងៃ Jay Chan រស់នៅទីក្រុងបូស្តុន រដ្ឋកាលីហ្វ័រនីញ៉ា និងបម្រើការងារជាទីភ្នាក់ងារស្វែងរកការងារឲ្យនិស្សិត។
ការសាងជីវិតថ្មីនៅលើទឹកដីអាមេរិក ទោះបីស្ថិតក្នុងបរិបទវប្បធម៌ថ្មីក្តី តែអ្នកមានឈាមជ័រជាតិខ្មែររូបនេះ នៅតែដិតដាមស្នាមវប្បធម៌ជាតិខ្លួន ហើយ Jay Chan ក៏បានទទួលការរៀនសូត្រភាសាខ្មែរដែលជាភាសាកំណើតរបស់ខ្លួនពី ម្តាយ និងបងប្អូនខ្មែរនៅជុំវិញខ្លួន។
ផ្ទុយពីក្មេងដទៃដែលរមែងនិយមបទបែបរ៉េប និងហ៊ីបហប Jay Chan បែរជាដិតជាប់ក្នុងចិត្តនូវទឹកដមសំនៀងរបស់អធិរាជសំឡេងមាសលោក ស៊ីន ស៊ីសាមុត ហើយជារឿយៗក្មេងម្នាក់នេះ បានព្យាយាមហាត់ច្រៀងបទ «ឯណាទៅឋានសួគ៌» តែម្នាក់ឯងនៅក្នុងបន្ទប់ ខណៈដែលខ្លួនមានវ័យទើបតែ១២ឆ្នាំ។
Jay Chan និយាយថា៖«ខ្ញុំចូលចិត្តស្តាប់ និងច្រៀងបទគាត់(ស៊ីន ស៊ីសាមុត) ដូចបទ ឯណាទៅឋានសួគ៌ មួយយប់ខ្ញុំច្រៀង៣-៤ដងឯណោះ»។ អ្នកចម្រៀងរូបនេះបន្តថា៖«យប់មួយម្តាយខ្ញុំបានឮខ្ញុំច្រៀងបទ នេះ គាត់លាន់មាត់ថា យី! អាអូនច្រៀងពីរោះម្ល៉េះ! ដូច្នេះខ្ញុំក៏កាន់តែមានកម្លាំងចិត្តខិតខំបន្តទៀត»។
ដោយសារមានឈាមជ័រជាអ្នកសិល្បៈ និងមានចំណូលចិត្តស្រាប់ Jay Chan ក៏បានចំណាយពេលវេលាពីការងារដើម្បីរៀនបន្ថែមការលេងព្យ៉ាណូ ការតែងទំនុកច្រៀង និងទំនុកភ្លេង។ ជាលទ្ធផលបន្ទាប់ពីចាប់និពន្ធទំនុកច្រៀងជាភាសាអង់គ្លេស Jay Chan ក៏បានចាប់ផ្តើមនិពន្ធទំនុកច្រៀងជាភាសាជាតិរបស់ខ្លួន។
Jay Chan និយាយថា៖ «ដោយការស្រឡាញ់ ខ្ញុំបានទៅរៀនភ្លេងបន្ថែម។ ៥-៦ឆ្នាំមុន ខ្ញុំបានតែងជាបទអង់គ្លេស លុះនៅក្នុងឆ្នាំ២០០៩ ខ្ញុំក៏ចាប់ផ្តើមសរសេរបទចម្រៀងជាភាសាខ្មែរម្តង»។
«ចម្លើយចុងក្រោយ» គឺជាស្នាដៃទី១របស់តារារូបនេះដែលបានថតជាចម្រៀង និងវីដេអូ រួចរាល់កាលពីពេលថ្មីៗនេះ ខណៈប៉ុន្មានបទទៀតកំពុងដំណើរការផលិត។ ថ្វីត្បិតទើបតែលេចចេញមួយបទក្តី តែ «ចម្លើយចុងក្រោយ» របស់ Jay Chan បានផ្ទុះឡើងនូវការគាំទ្រមិននឹកស្មានដល់នៅលើទឹកដីសហរដ្ឋ អាមេរិក។ បទចម្រៀងដែលសរសេរទំនុកច្រៀងដោយ Jay Chan និងធ្វើទំនុកភ្លេងដោយក្រុមការងារសុទ្ធតែជាកូនខ្មែរនៅអាមេរិក មួយនេះ ស្ទើរតែធ្វើបានល្អជាងស្នាដៃបទចម្រៀងនៅក្នុងស្រុកទៅទៀត ខណៈដែលទំនុកច្រៀងបានប្រើពាក្យពេចន៍ និងការប្រៀបធៀបយ៉ាងល្អ និងការថតវីដេអូប្រើបច្ចេកទេស 3D ស្ទើរតែដូចនឹងការពិត ជាមួយនឹងការកាត់តរួមបញ្ចូលគ្នារវាងអាមេរិក និងស្រុកខ្មែរ។
ប្រធានទំនាក់ទំនងសាធារណៈ និងទីផ្សារ Jay Chan នាង Sophaline Mao និយាយថា៖«ពួកខ្ញុំទាំងអស់សុទ្ធតែជាកូនខ្មែរ យើងព្យាយាមធ្វើវាឲ្យបានអស្ចារ្យនៅលើទឹកដីអាមេរិក យើងចង់បង្ហាញថា ខ្មែរយើងក៏មិនអន់ដែរ ដូចនៅក្នុងវីដេអូយើងធ្វើឲ្យផែនដីរលាយអ៊ីចឹង គឺយើងធ្វើឲ្យដូចជាការពិតតែម្តង»។
មានសំណួរជាច្រើនបានចោទសួរឡើងថា ហេតុអ្វីបានជា Jay Chan និងក្រុមការងារផលិតបទចម្រៀងខ្មែរនៅលើទឹកដីអាមេរិក?
Jay Chan ប្រាប់ថា៖«ការស្រឡាញ់បទចម្រៀងខ្មែរបានផ្តើមឲ្យខ្ញុំធ្វើរឿង នេះ ខ្មែរ និងប្រទេសផ្សេងស្តាប់បទអង់គ្លេស តែខ្ញុំចង់ធ្វើបទខ្មែរឲ្យអាគាំងស្តាប់ម្តង»។
អ្នកនាង Sophaline Mao បន្ថែមថា៖«បើយើងអត់ធ្វើ គឺយើងអត់ដឹងថា យើងទទួលការគាំទ្រប៉ុនណាទេ ហើយអ្វីដែលយើងធ្វើនៅពេលនេះ គឺចង់បំផុសវប្បធម៌ និងភាសាខ្មែររបស់យើងនៅអាមេរិក ធ្វើឲ្យកូនខ្មែរខំរៀនភាសាខ្លួនឡើងវិញ និងស្តាប់ចម្រៀងខ្មែរ។ ដូចដឹងហើយ កូនខ្មែរនៅអាមេរិកឥឡូវភាគច្រើនគេអត់ចង់និយាយភាសាកំណើតគេទេ»។
មិនមែនជាការលេងសើច នេះជាការព្យាយាមយ៉ាងខ្លាំងរបស់ Jay Chan និងក្រុមការងារក្នុងការរំលេចចេញឲ្យឃើញពីស្នាដៃមួយនេះ។ Jay Chan ឲ្យដឹងថា ការផលិតស្នាដៃមួយនេះមិនមែនជាការងាយស្រួលឡើយ ពោលគឺក្រុមការងាររបស់គេមានឧបសគ្គជាច្រើនទាំងការប្រើភាសា លទ្ធភាព និងពេលវេលា។
តារាចម្រៀងមានត្រេមុខស្រដៀងតារាចម្រៀងលោក សូលីដូ រូបនេះនិយាយថា៖«ខ្ញុំមានការលំបាកច្រើន ព្រោះខ្ញុំអាចសរសេរបទចម្រៀងបាន តែខ្ញុំគ្មានអ្នកជួយសម្រួលខ្ញុំទេ ហើយក្រុមការងារម្នាក់ៗសុទ្ធតែមានការងារធ្វើពេញម៉ោង យើងឆ្លៀតពេលនៅចុងសប្តាហ៍ទាំងអស់គ្នា។ អ្វីដែលសំខាន់នោះ គឺក្រុមការងារយើងមិនទាន់មានលទ្ធភាពអ្វីធំដុំនៅឡើយ»។
បន្ទាប់ពីបទចម្រៀង «ចម្លើយចុងក្រោយ» ទទួលបានប្រជាប្រិយភាពខ្លាំងនៅអាមេរិកក្នុងរយៈពេល២សប្តាហ៍ នៅពេលនេះ បទចម្រៀងនេះ ក៏កំពុងអន្ទងអារម្មណ៍ទស្សនិកជនកម្ពុជាមិនតិចដែរ តាមរយៈការទស្សនា Youtube ។
Jay Chan បានឲ្យដឹងបន្តថា ក្រៅពីទទួលបានការគាំទ្រច្រើនពីសំណាក់ប្រជាជនខ្មែរនៅអាមេរិក បទនេះក៏ទទួលបានការគាំទ្រពីពួកជនជាតិអាមេរិកដែរ ប៉ុន្តែបញ្ហាភាសាជាកត្តាដែលពួកគេពិបាកទទួលយក។ រូបគេបានបន្តថា ទីផ្សារសំខាន់សម្រាប់បទចម្រៀងគេ គឺនៅតាមបណ្តាប្រទេសដែលមានបងប្អូនខ្មែររស់នៅ ហើយអ្វីដែលរូបគេចង់បានគឺការគាំទ្រពីប្រទេសកម្ពុជា។
Jay Chan អ្នកចម្រៀងខ្មែរធំដឹងក្តីលើទឹកដីអាមេរិករូបនេះនិយាយថា៖« ក្នុងរយៈពេល២សប្តាហ៍ បន្ទាប់ពីខ្ញុំបង្ហោះក្នុង Youtube មានអ្នកគាំទ្រ១៥ ០០០នាក់ ៦០ភាគរយជាអ្នកនៅអាមេរិក។ ជាដំបូង ខ្ញុំចង់ទទួលការគាំទ្រពីពលរដ្ឋខ្មែរ នៅស្រុកខ្មែរ ហើយទីផ្សារបទចម្រៀងខ្ញុំគឺនៅបណ្តាប្រទេសមានបងប្អូនខ្មែរច្រើន ដូចជានៅអាមេរិក កាណាដា អូស្ត្រាលី ជាដើម។ ដោយឡែកពួកអាគាំងក៏ចូលចិត្តបទនេះដែរ តែពួកគេសួរថា មានអត្ថន័យយ៉ាងម៉េច...សើច»។
បទចម្រៀងអាល់ប៊ុមដំបូងរបស់ Jay Chan នឹងចេញលក់នៅពេលឆាប់ៗនេះ ហើយរូបគេបញ្ជាក់ថា នៅពេលអនាគតរូបគេគ្រោងនឹងផលិតបទចម្រៀងដែលមានភាសាខ្មែរពាក់ កណ្តាល និងអង់គ្លេសពាក់កណ្តាល ហើយបើអាចលោករួមនឹងក្រុមការងារ នឹងបង្កើតផលិតកម្មខ្មែរមួយនៅលើទឹកដីអាមេរិក។
លោកអ្នកអាចទស្សនាបទ «ចម្លើយចុងក្រោយ» ដ៏ពីរោះរបស់ Jay Chan តាមរយៈ http://www.youtube.com/watch?v=XIp__nguqjQ ឬក៏លោកអ្នកគ្រាន់តែបើកគេហទំព័រ Youtube ហើយវាយឈ្មោះ Jay Chan នោះលោកអ្នកនឹងទស្សនាបានភ្លាម៕
No comments:
Post a Comment